У рамках тыдня нулявога траўматызму ладзіўся чарговы раённы дзень аховы працы

Удзел у ім прадстаўнікоў камісіі па прафілактыцы вытворчага траўматызму і прафесіянальных захворванняў пры Любанскім райвыканкаме, кіраўнікоў, спецыялістаў арганізацый і прадпрыемстваў.

Вітаючы ўдзельнікаў нарады, начальнік упраўлення па працы, занятасці і сацыяльнай абароне Наталля Рабая акцэнтавала ўвагу на тым, што сур’ёзны падыход да пытання бяспекі дае добры вынік. Граматна і рацыянальна арганізаваная сістэма аховы працы дазваляе павысіць дысцыпліну і маральна-псіхалагічны клімат у калектыве, палепшыць прадукцыўнасць і паменшыць цякучасць кадраў, а галоўнае – зберагчы здароўе і жыццё людзей. Але, на жаль, пакуль не ўдаецца пазбегнуць няшчасных выпадкаў на вытворчасці. Таму Наталля Міхайлаўна настойліва параіла дакладна выконваць усім патрабаванні Дырэктывы №1 і адпаведны раённы план мерапрыемстваў, каб выправіць негатыўныя тэндэнцыі.

У працяг размовы намеснік начальніка аддзела занятасці і працоўных адносін Святлана Муравейка агучыла інфармацыю па тэме, вызначанай у якасці асноўнай – “Уздзеянне змен клімату на бяспеку і гігіену працы”.

– Як вядома, надвор’е аказвае пэўны ўплыў на нашу бяспеку. З пагаршэннем яго павялічваюцца прафесійныя рызыкі, напрыклад, ад анамальнай спякоты ці, наадварот, холаду. Што можа прывесці да пагаршэння ўмоў прафесійнай дзейнасці і павышэння магчымасці вытворчага траўматызму, захворванняў і нават смерці. На шчасце, у нашай краіне няшчасных выпадкаў з-за надта нізкіх альбо высокіх тэмператур не зарэгістравана. Тым не менш у залежнасці ад спецыфікі у арганізацыях прадугледжваюцца пэўныя меры для забеспячэння зручнага рэжыму працы і адпачынку ў выпадку неспрыяльнага надвор’я, – зазначыла Святлана Анатольеўна.

Таксама ўвага была звернута на іншыя актуальныя пытанні. У прыватнасці, на абавязковае праходжанне работнікамі вызначаных прафесій медыцынскіх аглядаў, парадак іх правядзення. Галоўны дзяржінспектар Слуцкага міжраённага аддзела абласнога ўпраўлення Дэпартамента дзяржаўнай інспекцыі працы Ігар Францкевіч распавёў пра змены ў расследаванні няшчасных выпадкаў на вытворчасці і прафзахворванняў.

Але куды лепш, каб іх увогуле не было. Для чаго варта кожнаму на сваім месцы адказна ставіцца да выканання абавязкаў, захавання вытворчай, тэхналагічнай дысцыпліны і, канешне, да уласнага самаадчування.