За мінулы год сапёраў выклікалі чатыры разы

У мінулым годзе ў Любанскі раён 4 разы выклікалася падзвіжная група размініравання падраздзяленняў Узброеных Сіл Рэспублікі Беларусь для абясшкоджвання снарадаў, якія выпадкова знайшлі грамадзяне.

Пра гэта паведаміў начальнік абасобленай групы (Любанскага раёна) ваеннага камісарыята Салігорскага і Любанскага раёнаў Мінскай вобласці Аляксандр Кійко. На два снарады ў лесе натрапілі грыбнікі. У першым выпадку на так званым «палігоне», што размешчаны паміж аграгарадком Таль і гарпасёлкам Урэчча. У другім – паблізу вёскі Вежанкі. Яшчэ адзін снарад знайшлі ў парку культуры і адпачынку горада Любані. А чацвёрты аказаўся ў полі зроку жыхара вёскі Ямінск, калі той наводзіў парадак на сваім прысядзібным участку.

Як пасля высветлілася, тры з чатырох снарадаў аказаліся вучэбнымі і не ўяўлялі ніякай пагрозы жыццю і здароўю людзей. Чаго нельга сказаць пра чацвёрты, знойдзены на палігоне. Гэта быў снарад часоў Вялікай Айчыннай вайны. Яго вывезлі на пустку і падарвалі.

На боепрыпасы, якія захоўвае зямля, можа натрапіць кожны. Таму важна ведаць, як правільна дзейнічаць у падобных сітуацыях. Спецыялісты звяртаюць увагу: ні ў якім разе снарад нельга кранаць. Трэба адысці ад яго на бяспечную адлегласць і паведаміць пра сваю знаходку ў міліцыю па кароткім нумары 102. Пасля чаго чакаць прыбыцця спецыялістаў.