З такімі працаўнікамі любая справа ладзіцца

22 мая 2019

139

З такімі працаўнікамі любая справа ладзіцца

У адкрытым акцыянерным таварыстве “БВА” каторы год запар на выкананні названага віду работ задзейнічаны Аркадзь Лучыновіч. На агрэгаце “Раса”ён з’аб’ездзіў вялікую колькасць палеткаў таварыства з маладымі ўзыходамі раслін. Зараз за дзень мужчына пратручвае каля паўтары сотні гектараў з яравымі. Пра ўвішнасць і вялікую адказнасць механізатара да справы ў гаспадарцы ведаюць не па чутках. Працуе Аркадзь Мікалаевіч тут з 1983 года, праўда, на пэўны час адлучаўся – нёс пачэсную службу ў арміі. Пасля выканання воінскага абавязка зноў прыйшоў у калектыў сельгасарганізацыі, на зямлі якой вырас і жыве. Як і большасць дзяцей, што жывуць у вёсцы, Аркадзь з дзяцінства зведаў, што такое сялянская праца і, як кажуць, што за гэтым стаіць, таму даручаную справу выконвае бездакорна, з захаваннем правілаў бяспекі. Дарэчы, ростул ядахімікатаў для апрацоўкі механізатар робіць самастойна, на гэта ў яго ёсць дазвол.

А вось ваду, якая выкарыстоўваецца ў якасці разбавіцеля атруты, падвозіць на ГАЗ-66 Уладзімір Нагорны. Пра гэтага вадзіцеля таксама вельмі станоўча адзываюцца ў таварыстве. Дарэчы, сёлета Уладзімір Мікалаевіч адзначыць 35-годдзе сваёй прафесійнай дзейнасці ў гаспадарцы. Амаль столькі часу ён адпрацаваў за рулём аўтамабіля ГАЗ-53, які і зараз у яго з’яўляецца асноўным пры выкананні работ. У гэтым годзе, напрыклад, падчас пасяўной кампаніі на ім дастаўляў на палеткі насенне.

– І Уладзімір Нагорны, і Аркадзь Лучыновіч заслугоўваюць слоў удзячнасці за тое, як яны выконваюць заданні кіраўніцтва “БВА”. Можна смела казаць, што гэтыя працаўнікі – надзейныя і добрасумленныя, – распавёў брыгадзір па ўчастку “Нежын” ААТ “БВА” Уладзімір Філіновіч. – Думаецца, пры добрых тэмпах да канца тыдня мы здолеем пратруціць ад пустазелля каля 80 працэнтаў пасяўных плошчаў, занятых яравымі культурамі.

Алена РАДКЕВІЧ.

gl_radkevich@tut.by

Фота аўтара.