Вось такі клопат пра чалавека працы

15 марта 2019

256

Вось такі клопат пра чалавека працы

Стварэнне належных умоў на рабочых месцах заўсёды на кантролі прафсаюзаў. Па гэтых пытаннях рэгулярна праводзяцца маніторынгі і праверкі. З пачатку 2019 года ў поле зроку грамадскага аб’яднання трапілі жывёлаводчыя фермы і комплексы сельгасарганізацый.

Як вядома, сельская гаспадарка – адна з самых важных галін эканомікі. Працу людзей у ёй лёгкай не назавеш, таму ўмовы, створаныя для працаўнікоў, павінны адпавядаць патрабаванням часу. Дбайныя кіраўнікі, сапраўдныя гаспадары арганізацый, зацікаўлены ў тым, каб чалавеку было дзе пераапрануцца з хатняга ў рабочае адзенне, памыцца пасля працы, папіць чаю ці кавы, азнаёміцца з вытворчымі паказчыкамі, навінамі і інш.

На мінулым тыдні рэйдавая група на чале са старшынёй Любанскай раённай арганізацыі прафсаюза работнікаў аграпрамысловага комплексу Віктарам Статкевічам, у склад якой увайшлі і журналісты аддзела сельскай гаспадаркі рэдакцыі газеты «Голас Любаншчыны», правяла маніторынг наяўнасці неабходных умоў для работнікаў на фермах і комплексах.

Без увагі не застаўся ніводзін аб’ект адпачынку, а іх, як аказалася, нямала, недзе каля паўсотні. Шчыра кажучы, давялося пабачыць рознае: парадак і наадварот, створаны камфорт і адсутнасць элементарных даброт. Пра апошняе, дарэчы, можна доўга весці размову, калі больш-менш дэталёва разглядаць пакоі жывёлаводаў МТФ «Жалы» і «Барыкоў» КСУП «Эксперыментальная база «Любанская», МТФ «Дварэц», «Бярэзінск» і «Падгалле» сельгасфіліяла «Гарадзяцічы» адкрытага акцыянернага таварыства «Любанскі райаграсэрвіс», дзе ад мінулых гадоў будаўніцтва камунізму яшчэ часткова засталася мэбля – сталы, шафы, тумбачкі, вешалкі для адзення, інфармацыйныя стэнды і інш.

Праўда, сёе-тое маецца і ад сучаснай цывілізацыі – умывальныя ракавіны, душавыя кабіны, унітазы, пральныя машыны-аўтаматы, халадзільнікі, печы ЗВЧ – толькі бяда ў тым, што не выкарыстоўваецца яно як трэба. Згодна з каментарыямі кіраўнікоў асобных сельгасарганізацый, прычын таму шмат: то рукамыйныя краны не ўстанавілі, то лямпачкі напальвання перагарэлі, а ў цемры мыцца нязручна, то не паспелі адрамантаваць душавы пакой, то часова загруваздзілі яго даільным абсталяваннем і інш. Напрыклад, на МТФ «Сарачы» ААТ «Чырвоная Змена» імя К.І. Шаплыкі» каторы год не працуе душавая – і нікому да гэтага няма справы. А вось на фермах «Смольгава» і «Ляхаўка» ААТ «Забалацкі» праблем з абуладкаваннем увогуле не існуе, таму што тут – ні душавых, ні нават вулічных туалетаў проста няма. Самі сабою напрошваюцца пытанні (відаць, яны рытарычныя) да кіраўнікоў і спецыялістаў гаспадаркі: як такое можа быць? Чаму ігнаруюцца важныя складальнікі аховы працы?

Сёння пакой адпачынку на комплексе па дарошчванні і адкорме буйной рагатай жывёлы «Атраднае» ААТ «Рачэнь», які ўсяго некалькі гадоў таму назад прывабліваў сваёй дагле-джанасцю, таксама абдзелены ўвагай. Праўда, таго не скажаш пра адпаведнае памяшканне на малочнатаварным комплексе «Рачэнь», дзе падтрымліваецца парадак, своечасова абнаўляецца інфармацыя на стэндах.

З клопатам да сваіх работнікаў ставяцца ў ААТ «Юрковічы», на МТК «Запалле», дзе па-сучаснаму абуладкаваны пакой бытавой электратэхнікай, мэбляй, посудам, заўсёды чыста, утульна – і так не першы год. Працаўнікі МТК з задавальненнем збіраюцца ў пакоі, каб не толькі зрабіць перапынак у рабоце, але і абмеркаваць надзённае.

Рэйдавая група адзначыла, што нядрэнна абуладкаваны памяшканні для жывёлаводаў на МТФ «Нежын», «Падмошша», «Фарашчова» адкрытага акцыянернага таварыства «БВА». На фермах аграгарадка Асавец ААТ «Асавец-агра» і вёскі Загалле сельгасупраўлення «Загальскі» ААТ «МАПІД» належныя ўмовы для людзей створаны і на падворках. Гэта не ноу-хау, а нармальная арганізацыя вытворчага працэсу ў цэлым.

Словам, відавочна тое, што да чалавека працы ў сельгасарганізацыях раёна ставяцца па-рознаму. У плане стварэння камфорту на рабоце можна палепшыць многае не толькі кіраўнікам і спецыялістам гаспадарак, але і самім работнікам ферм і комплексаў.