У Любанскім лясгасе завяршыўся сезон перапрацоўкі шышак сасны звычайнай

Частка атрыманага насення будзе выкарыстана падчас стварэння лясных культур шляхам высейвання, астатняе накіруюць на захоўванне ў рэспубліканскі лясны селекцыйна-насенняводчы цэнтр, што знаходзіцца пад Мінскам. Пра гэта «ГЛ» паведаміла інжынер па лесаўзнаўленні Ларыса Сухнат.

Нарыхтоўка шышак стартавала напрыканцы лістапада і фінішыравала ў студзені. У цэлым іх было сабрана 12 858 кілаграм, альбо 153 працэнта да задання. Найбольш – ў Асавецкім (2 606 кг), Жалаўскім (2007 кг) і Калінаўскім (1913 кг) лясніцтвах.

Са студзеня і да сярэдзіны сакавіка на шышкасушылцы, што размешчана ў Асавецкім лясніцтве, вялася перапрацоўка сабранай сыравіны. У выніку было атрымана 148,5 кілаграма насення.