У Любанскай раённай цэнтральнай бібліятэцы дадзены старт Display-кросінгу «Вялікая сіла – адзінства народа»

Арганізаваны ён аддзелам бібліятэчнага маркетынгу пры падтрымцы РЦБ з мэтай развіцця і рэалізацыі творчых здольнасцяў бібліятэкараў, удасканалення дзейнасці па арганізацыі кніжных выстаў, укаранення інавацыйных форм работы з чытачамі, садзейнічання іх грамадзянска-патрыятычнаму выхаванню. Плануецца, што ў рамках новага праекта будзе праведзены шэраг аўтарскіх і калектыўных выстаў, дзе знойдуць адлюстраванне традыцыйная культура, духоўная спадчына, творчасць пісьменнікаў-землякоў і іншыя тэмы. А напрыканцы года конкурсная камісія зробіць грунтоўны аналіз і вызначыць лепшыя распрацоўкі.

Распачала Display-кросінг прэзентацыя выставы «Я пазнаю Беларусь», аформленай у чытальнай зале. Прысутныя з цікавасцю слухалі інфармацыю пра прадстаўленыя выданні – гістарычныя, публіцыстычныя, мастацкія. З дапамогай іх чытачы, наведвальнікі бібліятэкі могуць пашырыць веды пра малую радзіму і ўсю Бацькаўшчыну, гераічныя старонкі мінулага роднага краю, значныя падзеі, славутых людзей, традыцыі.

Змястоўны аповед нікога не пакінуў раўнадушным. І некаторыя з удзельнікаў нават выказалі жаданне прачытаць творы, прысвечаныя Айчыне. Прагучалі лірычныя вершы, напоўненыя незвычайнай цеплынёй, шчырасцю, пра маляўнічыя краявіды нашай краіны, яе моц і палымяных патрыётаў, верных сыноў сваёй дзяржавы.

Падсумоўваючы, начальнік аддзела ідэалагічнай работы, культуры і па справах моладзі райвыканкама Таццяна Аляксеева зазначыла, што дадзены праект вельмі карысны, асабліва ў Год народнага адзінства. Ён, безумоўна, пасадзейнічае павышэнню гістарычнай і патрыятычнай свядомасці насельніцтва, развіццю інтарэса да мінулага і сучаснасці, разуменню таго, што Беларусь моцная суверэнная дзяржава. І вельмі важна нам усім разам захаваць тое, што маем.