У Любанскай ДШМ адбылося пасвячэнне ў першакласнікі

Штогод у Любанскую школу мастацтваў прыходзяць новыя рабяты, якія жадаюць навучыцца іграць на музычных інструментах, прыгожа спяваць, маляваць, танцаваць, набыць акцёрскія навыкі. І традыцыйна ў Дзень музыкі, 1 кастрычніка, ладзіцца ўрачыстасць па пасвячэнні іх у першакласнікі. Вось і на мінулым тыдні праведзена яна для дзяўчынак і хлопчыкаў, якія робяць першыя крокі ў дзівосны свет мастацтва. У зале панавала атмасфера сапраўднага свята. Рабяты наперабой адгадалі загадкі вядучых. А таксама актыўна апладыравалі ўдзельнікам канцэртнай праграмы, вучням старэйшых класаў, якія ўжо дасягнулі пэўных поспехаў. Гучалі прыгожыя кампазіцыі ў выкананні юных скрыпачак, гітарыстаў, баяністаў, дзіцячага хора і інш. А ў навучэнцаў тэатральнага аддзялення адбылося дэбютнае выступленне. Тым не менш яны выдатна справіліся і парадавалі гледачоў. Напрыканцы мерапрыемства першакласнікі далі клятву і сталі паўнапраўнымі навучэнцамі школы мастацтваў. Поспехаў ім у творчай дзейнасці, натхнення, старання, настойлівасці і цярпення пажадала намеснік дырэктара Любанскай ДШМ Марына Кубец. Каб рабяты наведвалі заняткі з ахвотай і атрымлівалі задавальненне ад таго віду мастацтва, якім займаюцца.