Шчыруюць над тэхнікай

На двары МТП «Кузьмічы» адкрытага акцыянернага таварыства «БВА» ў гэтыя лютаўскія дні поўным ходам ідзе падрыхтоўка да веснавых палявых работ. Кожны механізатар сам рамантуе замацаваныя за ім агрэгаты, а калі ўзнікае неабходнасць, хлопцы дапамагаюць адзін аднаму, з разуменнем падыходзяць да справы – кожная машына павінна быць укамплектаванай, наладжанай, з правільнай рэгуліроўкай і тэхналагічнымі настройкамі.

– Пасяўныя агрэгаты, а гэта тры шыроказахопныя сеялкі, што будуць задзейнічаны на сяўбе, мы адправілі на рамонт у Любанскі райаграсэрвіс. Тут, на месцы, наладжваем барану БДТ-7, дыскатар АДУ-6 і інш. – словам, усё тое, што можам зрабіць уласнымі сіламі, – падзяліўся галоўны інжынер ААТ «БВА»Уладзімір Міхаленя.

Зараз у сельгасарганізацыі выкананы значны аб’ём рамонтных работ, між тым яшчэ не ўсё неабходнае пастаўлена на лінейку гатоўнасці. Зыходзячы з наступнага, кіраўніцтвам гаспадаркі акрэслена задача зрабіць гэта ў бліжэйшы час, тым больш што неабходныя запчасткі набыты.