Прыём грамадзян і «прамую тэлефонную лінію» правёў старшыня райвыканкама Валерый Мельнік

Ён уважліва выслухаў пытанні любанчан. Сярод зваротаў былі як індывідуальнага характару, так і звязаныя з грамадскімi інтарэсамi. На некаторыя з іх тлумачэнні дадзены адразу. Астатнія ўзяты на кантроль.

Таццяна Максімаўна ад імя аднавяскоўцаў з Трайчан турбавалася наконт дайшоўшай да іх чуткі пра закрыццё магазіна ў населеным пункце. Але Валерый Віктаравіч запэўніў – можна не хвалявацца, гандлёвы аб’ект працягне працаваць.

Традыцыйна некалькі пытанняў тычыліся тэмы навядзення парадку. Так, жыхары дома №94 па вуліцы Леніна ў райцэнтры  паскардзіліся на тое, што пасля дажджу побач са шматпавярховікам утвараецца вялікая лужына. У сваю чаргу кіраўнік раёна паведаміў: «Зараз рыхтуецца праектна-каштарысная дакументацыя па добраўпарадкаванні мікрараёна Любані, згодна з якой будзе прадугледжана і абуладкаванне сістэмы ліўнёвай каналізацыі». Адпаведна і праблема гараджан вырашыцца. А вось сітуацыю ў в. Смольгава выправіць атрымаецца раней. Там неабходна падсыпаць дарогу каля магазіна. І літаральна пасля «прамой лініі» спецыялісты жыллёва-камунальнай гаспадаркі, на балансе якой знаходзяцца дарогі ў населеных пунктах раёна, выехалі на месца і вызначылі аб’ём работ. У бліжэйшы час работнікі ДРБУ 193 па дагаворы выканаюць падсыпку і грэйдзіраванне.

Жыхарка Любані выказала нараканні на ЖКГ з прычыны затаплення кухні. Старшыня райвыканкама, выслухаўшы, даў даручэнне кіраўніцтву жыллёва-камунальнай гаспадаркі неадкладна высветліць, у чым справа. Што было зроблена аператыўна. Спадзяёмся, і работы па ўхіленні прычын затаплення будуць выкананы ў хуткім часе.

Пра магчымасць выкупа жылых памяшканняў у п. Радуга, што належаць КСУП «Таліца-агра», альбо прадаўжэння тэрміну дагавора арэнды (ён заключаны ў снежні 2016 г. на 5 гадоў) пыталіся ў В.В. Мельніка некалькі гараджан. Пытанне будзе дэталёва вывучана адпаведнымі службамі, паабяцаў ён, і заяўнікам у адведзены заканадаўствам тэрмін час дадзены вычарпальны адказ.