Прычынай ляснога пажару паблізу вёскі Шыпілавічы паслужыў чалавечы фактар

Колькасць лясных пажараў, якія сёлета адбыліся на тэрыторыі Любанскага раёна, павялічылася да чатырох.

Пра гэта «ГЛ» паведаміў інжынер па ахове і абароне лесу Любанскага лясгаса Аляксандр Варвашэвіч.

Чацвёрты лясны пажар здарыўся 7 красавіка паблізу вёскі Шыпілавічы. У ліквідацыі ўзгарання прымалі ўдзел работнікі лесу, а таксама выратавальнікі. Агульнымі намаганнямі патушыць яго змаглі даволі хутка. Агонь прайшоўся па тэрыторыі, плошча якой склала 2,6 гектара. Прычынай пажару паслужыў чалавечы фактар.

Нагадаем, у лясным фондзе Любанскага раёна з 10 красавіка дзейнічае абмежаванне на наведванне. Гэта значыць, што грамадзянам знаходзіцца ў лесе дазваляецца, а вось паліць у ім вогнішчы забараняецца.