Праведзены трэнінг для старшынь, іх намеснікаў і сакратароў участковых камісій

Па ініцыятыве акруговай выбарчай камісіі №69 праведзены трэнінг для старшынь, іх намеснікаў і сакратароў участковых камісій па выбарах дэпутата Палаты прадстаўнікоў Нацыянальнага сходу Рэспублікі Беларусь сёмага склікання. 

Падчас яго абмеркавана шмат арганізацыйных пытанняў. Вядома, многія з прысутных ужо не ўпершыню прымаюць удзел у такой важнай палітычнай кампаніі, аднак і ім, як і новым членам камісій, было што пачарпнуць.

Трэнінг прайшоў у фармаце дзелавой гульні ў тры этапы: датэрміновае галасаванне, галасаванне ў дзень выбараў (на ўчастку і па месцы знаходжання выбаршчыкаў), падлік галасоў і ўстанаўленне вынікаў галасавання. Мадэляваліся і вырашаліся розныя сітуацыі, якія могуць узнікнуць на самой справе. Для чаго памяшканне было ўмоўна раздзелена на два сектары. У першым у адпаведнасці з патрабаваннямі выбарчага заканадаўства былі абуладкаваны рабочыя месцы для членаў участковай камісіі, назіральнікаў, устаноўлены скрыні трох відаў – для датэрміновага галасавання, для галасавання ў дзень выбараў непасрэдна на ўчастку і па месцы знаходжання выбаршчыкаў, а таксама кабіна для галасавання, металічны сейф. Там жа размешчаўся інфармацыйны стэнд. У другім сектары знаходзіліся ўдзельнікі трэнінгу, якія выконвалі функцыі экспертаў, ролі выбаршчыкаў, прадстаўнікоў СМІ, супрацоўнікаў міліцыі і інш. Былі адпрацаваны розныя моманты і замацаваны практычныя навыкі ў членаў камісій, у тым ліку і па арганізацыі галасавання выбаршчыкаў з абмежаванымі фізічнымі магчымасцямі.

Варта дадаць, што аналагічныя трэнінгі запланаваны ва ўсіх ўчастковых камісіях. Галоўная мэта іх – замацаванне патрабаванняў заканадаўства, забеспячэнне дэмакратычнасці выбарчага працэсу, адкрытасці і празрыстасці падліку галасоў і ўстанаўлення вынікаў галасавання.