Прадстаўніцы прыгожай паловы за мір і стабільнасць

Дэлегацыя Любаншчыны прыняла ўдзел у жаночым форуме «За Беларусь!», які прайшоў у «Мінск-Арэне».

Увогуле на яго сабралася звыш дзесяці тысяч беларусак, прадстаўніц самых розных прафесій, узростаў, але аднолькава адданых сваёй Айчыне. Іх аб’ядноўвае жаданне жыць у сваёй краіне – мірнай, спакойнай і стабільнай, гадаваць дзяцей і з упэўненасцю глядзець у будучыню.

Некаторыя з удзельніц рэспубліканскага мерапрыемства выступілі з прамовамі, агучылі свой пункт гледжання на тую сітуацыю, што склалалася ў сталіцы і асобных рэгіёнах рэспублікі, заклікалі спыніць пратэсты і правакацыі, захаваць Бацькаўшчыну для нашчадкаў. Паміж выступленнямі гучалі музычныя кампазіцыі. Цудоўныя песні, сярод якіх шмат патрыятычных, выканалі беларускія і расійскія артысты. Бурнымі авацыямі віталі прысутныя Руслана Аляхно, Аляксандра Саладуху, Мікалая Баскава і іншых. Нікога, бадай, не пакінула раўнадушным песня «Любімую не атдаюць», прэм’ера якой адбылася падчас форуму.