Пра важнасць маючага адбыцца форуму паразважала старшыня раённай арганізацыі вэтэранаў Тамара Хаўстовіч

– Усебеларускі народны сход – знакавая падзея, падчас яе будуць абмеркаваны самыя надзённыя пытанні сацыяльна-эканамічнага развіцця краіны, выпрацавана стратэгія для далейшай дзейнасці. І важна, што дадзена магчымасць грамадзянам выказаць свой пункт гледжання, сваю пазіцыю, сваё бачанне будучага шляху.

Як педагог у мінулым, лічу, больш увагі трэба надаваць рабоце з моладдзю і выхаванню патрыятызму ў падрастаючага пакалення. Паняцці “Бацькаўшчына”, “Айчына”, “Радзіма”  павінны быць напоўнены для дзяцей і падлеткаў асаблівым сэнсам, гісторыяй і традыцыямі. Каб яны цанілі дасягненні папярэднікаў, ганарыліся родным краем, шанавалі спадчыну і не забывалі пра мінулае. Бо без захавання трывалага фундамента немагчыма пабудаваць нешта новае – моцнае і годнае.

Правільным і своечасовым на форуме будзе ўзняць праблемы павышэння прэстыжу сям’і, размеркавання выпускнікоў устаноў адукацыі і замацавання іх на першым працоўным месцы, дапамогі маладым спецыялістам у паляпшэнні жыллёвых умоў. Каб наша моладзь паўнавартасна рэалізавала сябе ў розных сферах і прыносіла карысць рэгіёну, краіне, грамадству.

Для сталых грамадзян актуальным з’ўляецца пытанне пенсіённага забеспячэння. Таму хочацца, каб у новай пяцігодцы часцей праводзіўся пераразлік не толькі сацыяльных, а і працоўных пенсій. Бо ад гэтага залежыць узровень жыцця людзей, якія знаходзяцца на заслужаным адпачынку.