Падведзены вынікі творчага конкурсу «Рэха мінулага сэрца кранае»

З канца студзеня і да 20 красавіка рэдакцыяй газеты «Голас Любаншчыны» праводзіўся творчы конкурс. На яго паступіла звыш трыццаці работ як ад школьнікаў, так і ад дарослых жыхароў нашага раёна. Мы нават не ўсе паспелі надрукаваць. Але журы, безумоўна, разгледзела кожны дасланы паэтычны і празаічны твор.

Вялікі дзякуй удзельнікам за такую актыўнасць і патрыятычны настрой. Важна, што тэма Вялікай Перамогі нават праз 75 гадоў застаецца актуальнай і хвалюе нашых чытачоў. Паверце, кожная з творчых работ знайшла водгук у сэрцах супрацоўнікаў рэдакцыі. І зусім не проста было вызначыць пераможцаў.

У адпаведнасці з палажэннем іх павінна быць шэсць – па адным ў трох узроставых катэгорыях у намінацыях «Таямніцы слова і думкі» (паэтычныя і празаічныя творы пра вайну) і «Гераічнае мінулае малой радзімы ў малюнках і фотаздымках. Аднак апошніх практычна не было пададзена конкурс. Таму вырашана пераможцаў не прызнаваць, але адзначыць Падзячным лістом самую юную ўдзельніцу – васьмігадовую Аляксандру Паўлін, вучаніцу 2 «А» класа Гімназіі №1 г. Любані. Дарэчы, дзяўчынка адзіная прыняла ўдзел у сваёй узроставай катэгорыі і ў другой намінацыі.

Большасць паэтычных і празаічных твораў прадстаўлена ўдзельнікамі конкурсу ад адзінаццаці гадоў і старэйшымі. Сярод іх у катэгорыі ад 18 гадоў лепшым аднагалосна прызнана Зінаіда Майсяеня з аграгарадка Сарачы. «Чытаючы яе вершы «У чатырнаццаць стаў ён салдатам», «Вайна», міжволі пранікаешся тым болем, які на сэрцы ў жанчыны, і на вачах з’яўляюцца слёзы», – адзначана членамі журы. Высокую адзнаку іх атрымалі і паэтычныя творы васьмікласніцы Атрадненскай СШ Анастасіі Ленскай «Там проста выжывалі», «Успаміны». Яна стала пераможцай у катэгорыі ад 11 да 17 гадоў.

Па ўмовах конкурсу таксама быў вызначаны ўладальнік прыза глядацкіх сімпатый па выніках галасавання ў групе «Голас Любаншчыны» ў сацыяльнай сетцы «ВКонтакте». Гэта – Анатоль Вялічка, за работу якога («Кавалер трох баявых ордэнаў») аддалі галасы 52 са 160 падпісчыкаў.

Віншуем усіх пераможцаў. Спадзяёмся, што і надалей любанчане будуць прымаць удзел у конкурсах раёнкі, дзяліцца сваімі творчымі знаходкамі.