Намеснік старшыні Любанскага райвыканкама пагутарыў з работнікамі лясгаса

Прадстаўнікі раённай улады праводзяць сустрэчы з працоўнымі калектывамі, каб глыбей уведаць, што хвалюе іх, якія ёсць праблемы, і, безумоўна, аказаць садзейнічанне ў іх вырашэнні. Так, намеснік старшыні райвыканкама па эканоміцы Мікалай Кудра днямі пагутарыў з работнікамі лясгаса.

Напачатку размовы ён пазнаёміў прысутных з вынікамі сацыяльна-эканамічнага развіцця Любаншчыны. Агучыў, якія маюцца дасягненні на рахунку прадпрыемстваў і арганізацый рэгіёна. Мікалай Мікалаевіч зазначыў, што паслядоўная работа ў раёне вядзецца па добраўпарадкаванні населеных пунктаў, будаўніцтву, развіццю інфраструктуры горада і інш. Засяродзіў увагу прадстаўнік улады таксама на тых накірунках, над якімі неабходна асабліва плённа працаваць сёлета, каб захаваць тэмп росту вытворчасці і выканаць намечаныя планы ва ўсіх галінах народнай гаспадаркі.

Падчас сустрэч быў закрануты шэраг надзённых пытанняў. Работнікі лясгаса, у прыватнасці, цікавіліся пра перспектывы развіцця нашага рэгіёна з улікам таго, што будуецца  горна-узбагачальны комплекс па здабычы калійнай руды і вытворчасці калійных угнаенняў. Акрамя таго,  некаторыя з прысутных звярнуліся да М.М. Кудры з запытамі асабістага характару. Канешне ж, ён уважліва выслухаў кожнага. На большасць паступіўшых зваротаў намеснік старшыні райвыканкама адказаў адразу. На астатнія паабяцаў даць тлумачэнні пасля дадатковага вывучэння.