На тэрыторыі прыхода храма Праабражэння Гасподняга ў г. Любані створаны міні-заапарк

Ён прыцягвае, дарэчы, не толькі юных прыхаджан, выхаванцаў нядзельнай школы, а і дарослых. Многія з любанчан, якія наведваюць храм, абавязкова завітваюць і да жывёлін. “Калі назіраеш за імі, – кажуць некаторыя, узнімаецца настрой, з’яўляецца адчуванне незвычайнага спакою, псіхалагічнага камфорту”.

Як распавёў настаяцель прыхода, благачынны нашай царкоўнай акругі протаіерэй Аляксандр Драгун, некалькі гадоў таму ў яго з’явілася ідэя завесці некалькі дэкаратыўных вавёрак. Але з імі, на жаль, не атрымалася – не змог набыць. Затое купіў парачку прыгожых трусаў (кроликов). Неўзабаве сябры падарылі дзвюх ліс – звычайную рыжую і чорна-бурую. А зараз ужо ў міні-заапарку звыш 20 асобін – акрамя трусаў і ліс, ёсць насухі (род невялікіх млекакормячых сямейства янотавых), козлік белай бельгійскай пароды, марскія свінкі, в’етнамскія пятух і курачкі. За імі ажыццяўляеца пастаянны догляд, і ўсе жывёліны адчуваюць сябе ўтульна. Трусаў ужо развялося шмат, і ўлетку іх, зазначыў свяшчэннаслужыцель, нават раздавалі жадаючым трымаць такіх жывёлін дома.

Сам айцец Аляксандр штодзень абавязкова прыходзіць да клатак з жывёламі, корміць іх, назірае за паводзінамі. І не губляе надзеі ўсё ж такі завесці яшчэ і дэкаратыўных вавёрачак – вельмі падабаюцца яны.