На Любаншчыне стартаваў трэці працоўны семестр

Як паказвае практыка, кожны год падчас летніх канікул у моладзі ўзрастае інтарэс да працоўнай дзейнасці. Многія юнакі і дзяўчаты жадаюць быць залічаны ў студатрад і шчыраваць на карысць малой радзімы.

Вось і сёлета стартаваў трэці працоўны семестр. Знайсці вакансіі на летні перыяд старшакласнікам любанскіх школ, навучэнцам сяльгасліцэя, а таксама студэнтам, ураджэнцам раёна па традыцыі дапамагае райкам грамадскага аб’яднання «БРСМ». Акрамя таго, дадзенае пытанне трымае на ўзбраенні і аддзел ідэалагічнай работы, культуры і па справах моладзі. Як паведаміла галоўны спецыяліст яго Юлія Хацько, некалькі студатрадаў ужо сфарміравана. Так, з 1 ліпеня прыступіў да работы «Фенікс». Экалагічны атрад (па добраўпарадкаванні і азеляненні) у саставе чатырнаццаці чалавек заняты ў жыллёва-камунальнай гаспадарцы. Рабяты ад 14 гадоў і старэйшыя на чале з камандзірам Анастасіяй Мірэйчык, студэнткай Мінскага індустрыльна-педагагічнага каледжа, на працягу двух тыдняў будуць выконваць даручэнні кіраўніцтва ЖКГ. Падлеткі, дарэчы, з першых дзён працуюць сумленна і рупліва. «Каб з нашай дапамогай горад стаў яшчэ больш прыгожым», – з усмешкай у адзін голас зазначылі яны.

Следам, з 6 ліпеня, пачнуць работу будаўнічы атрад «Максімум» на базе перасоўнай механізаванай калоны 201 і яшчэ адзін ў таварыстве з абмежаванай адказнасцю «МіраГарант». У першым з іх сем «байцоў», навучэнцаў прафесійнага сельскагаспадарчага ліцэя, у другім – дзесяць, сярод якіх не толькі ліцэісты, а і вучні Гімназіі №1 г. Любані, студэнты Салігорскага дзяржаўнага каледжа. Пазней плануецца стварыць яшчэ педагагічны студатрад, удзельнікі яго паспрабуюць свае сілы ў якасці выхавальнікаў дзіцячага аздараўленчага лагера «Арэса». Таксама малады працоўны дэсант будзе шчыраваць у сельскагаспадарчых прадпрыемствах – на збожжатоках у час жніўнай кампаніі і не толькі.

Юлія Дзмітрыеўна выказала спадзяванне, што маладыя людзі з карысцю правядуць так званы трэці семестр, атрымаюць прафесійныя навыкі і прадэманструюць свае лідарскія якасці. А наконт таго, каб падчас іх работы захоўваліся ўсе нормы заканадаўства па ахове працы, паклапоціцца раённая мабільная група па кантролі і каардынацыі дзейнасці студэнцкіх атрадаў.