Каля 20 пытанняў было адрасавана старшыні Любанскага райвыканкама падчас чарговай суботняй «прамой лініі»

Гараджанін, які мае дачу ў Асаўцы, паскардзіўся, што сельвыканкам не выдае даведку на рэалізацыю сельскагаспадарчай прадукцыі. В.В. Мельнік зазначыў, калі таму ніякіх абмежаванняў няма, то заяўнік атрымае неабходны дакумент. І сапраўды пры паўторным звароце даведка была выдадзена.

Шэраг запытаў датычылі добраўпарадкавання: асфальтавання вул. Камсамольскай у аграгарадку Таль, грэйдзіравання вуліц у вёсцы Зялёнкі (сапсаваны лесавозамі), дарогі Нежын – Камуна, падсыпкі ў в. Куценцы, навядзення парадку каля дома 107 па вул. Леніна ў Любані пасля рамонту адмосткі і інш. Таксама інвалід па зроку выказаў нараканні на тое, што ў райцэнтры не ўсюды абуладкавана безбар’ернае асяроддзе: не апушчаны бардзюры на пешаходных пераходах па вул. Першамайскай, Леніна, Я. Купалы, Калініна і г.д. Усе заўвагі прыняты да ведама і накіраваны для ўхілення ў жыллёва-камунальную гаспадарку, лясгас, ДРБУ 193. А вывучыць магчымасць прыстасавання крыніцы ў Зялёнках пад пажарны вадаём належыць у бліжэйшы час раённаму аддзелу па надзвычайных сітуацыях.

Наконт дрэннай якасці вады паскардзілася жыхарка в. Ямінск. Данае пытанне адрасавана ў КУП «Салігорскводаканал». А раённаму цэнтру гігіены і эпідэміялогіі даручана забяспечыць лабараторны кантроль.

Адзін са зваротаў тычыўся выдачы чэкаў «Жыллё». Заяўніцы раней ужо даваліся тлумачэнні, але яе, што называецца, не задаволілі. Таму зварот будзе разгледжаны паўторна і дадзены абгрунтаваны адказ.

Зададзены старшыні райвыканкама і іншага кшталту пытанні. І ўсё, што хвалюе насельніцтва, не пакінута без разгляду.