Грамадская прыёмная – магчымасць падзяліцца ініцыятывай

Працягваецца прыём прапаноў і пажаданняў наконт развіцця  рэгіёна,  канстытуцыйнай рэформы ў краіне і іншых актуальных праблемах.

Як адзначыла начальнік аддзела ідэалагічнай работы, культуры і па справах моладзі райвыканкама Таццяна Аляксеева, за перыяд дзеяння грамадскай прыёмнай ад жыхароў Любаншчыны паступіла каля дваццаці пытанняў. Амаль усе яны датычаць стварэння камфортных умоў пражывання людзей, забеспячэння жыццядзейнасці прадпрыемстваў і ўстаноў,  развіцця інфраструктуры горада, падтымання парадаку і чысціні на вуліцах. Прадстаўнікі разнастайных служб, грамадскіх арганізацый раёна  гэтыя пытанні  перадалі для апрацоўкі, аналізу і абагульнення ў  адпаведныя органы згодна з іх кампетэнцыяй. Шэраг зваротаў, у прыватнасці, пераадрасавана жыллёва-камунальнай гаспадарцы. Практычна ўсе яны надзённыя. І большасць ужо вырашана.

У мінулую суботу ў грамадскай прыёмнай дзяжурылі Т.М. Аляксеева і старшыня раённай арганізацыі прафсаюза работнікаў адукацыі і навукі Аляксандр Брагінец. Ім патэлефанаваў жыхар вул. Леніна ў г. Любані, які агучыў некалькі ініцыятыў, у тым ліку аб абуладкаванні дзіцячай пляцоўкі. Цяпер, канешне, не час для такіх работ. Але пажаданне, вядома ж, прынята да ведама.

На гэтым жа тыдні, у сераду, прапановы насельніцтва прымалі старшыня раённага Савета дэпутатаў Андрэй Драбудзька і начальнік інспекцыі прыродных рэсурсаў і аховы навакольнага асяроддзя Аляксандр Малашук.