Галоўнае – каб было жаданне працаваць

З 2018 года ў нашым раёне функцыянуе камісія па каардынацыі работы па садзейнічанні занятасці насельніцтва, якую ўзначальвае старшыня райсавета дэпутатаў Андрэй Драбудзька. У склад яе ўваходзяць кіраўнікі і спецыялісты структурных падраздзяленняў райвыканкама, прадстаўнікі грамадскіх арганізацый, дэпутаты абласнога, раённага, сельскіх Саветаў дэпутатаў. Сваёй галоўнай задачай члены камісіі лічаць усебаковае аказанне дапамогі тым, хто ў сілу розных прычын не здольны на роўных канкурыраваць з іншымі прэтэндэнтамі на рынку працы.

На пастаяннай аснове вядзецца работа з базай даных пра асоб, якія не заняты ў эканоміцы. «Да кожнага чалавека – індывідуальны падыход. А інакш і быць не можа, лічыць намеснік старшыні камісіі, начальнік упраўлення па працы, занятасці і сацыяльнай абароне Наталля Рабая. – Мы стараемся выслухаць, унікнуць у сітуацыю, падтрымаць, аказаць кансультацыйную, метадычную, прававую дапамогу па пытаннях працаладкавання і самазанятасці. Абставіны могуць быць розныя, і часам людзям проста патрэбен нейкі штуршок, каб знайсці сябе і быць патрэбным грамадству. Але здараецца, на вялікі жаль, і так, што чалавек ахінуты ўвагай, яму прапанаваны розныя варыянты занятасці, аднак  працаўладкоўвацца ён не спяшаецца, ці ўвогуле адмаўляецца і працягвае весці асацыяльны лад жыцця. І гэта, канешне ж, праблема».

Тым не менш, калі ёсць станоўчыя вынікі, то можна сведчыць, што камісія дзейнічае не дарэмна. За мінулы год праведзена 25 пасяджэнняў, у тым ліку адно ў рамках агульнарэспубліканскай акцыі «Адзіны дзень занятасці» ў фармаце кірмаша вакансій пад дэвізам «Знойдзем работу разам!», 12 – выязных. Ахоплены ўсе сельскія саветы, у некаторых, дзе больш напружаная сітуацыя з беспрацоўем, члены камісіі пабывалі не адзін раз. Канструктыўная размова адбылася з больш як 350 жыхарамі нашага раёна (запрашэнняў жа было накіравана звыш тысячы). Пасля чаго 128 чалавек напраўлена ў аддзел занятасці для рэгістрацыі ў якасці беспрацоўнага, 130 – да наймальнікаў.

Як станоўчы, можна прывесці прыклад адной з жыхарак Любаншчыны, якая завітала на пасяджэнне камісіі з цвёрдым намерам працаўладкавацца, а дакладней пачаць уласную справу. І атрымала садзейнічанне. Была накіравана на адпаведныя навучальныя курсы, а потым змагла скарыстацца субсідыяй для арганізацыі прапрымальніцкай дзейнасці ў памеры 15 бюджэтаў пражытковага мінімуму. Жанчына адкрыла цырульню ў сельскім населеным пункце і зараз паспяхова аказвае паслугі насельніцтву.

Такая магчымасць маецца і ў іншых беспрацоўных. Можна таксама прайсці перападрыхтоўку, паспрабаваць сябе ў другой прафесіі, больш запатрабаванай у рэгіёне, і г.д. Камісія абавязкова дапаможа, галоўнае толькі, каб у людзей прысутнічала жаданне працаваць.