Фотарэпартаж: У мінулую суботу ў Новай Дуброве адгрымела свята «Гасцявы кірмаш»

Напрыканцы жніўня ў невялічкую вёску завіталі суседзі з іншых пасёлкаў, з’ехаліся былыя жыхары з розных гарадоў Беларусі, людзі з замежжа. Сярод прысутных быў і карэспандэнт «ГЛ», які дакладвае абстаноўку.

Мінуўшы атрадненскія прасторы, за некалькі кілометраў да запланавага месца мерапрыемства, уздоўж дарогі ішлі вяскоўцы. Усе прыгожыя – збіраліся на свята. Насупраць навадуброўскай крамы з’явілася вялікая аўтамабільная стаянка: машын на розны густ і колер, большасць – госці з Салігорскага раёна, ёсць нумары з іншых рэгіёнаў. Напэўна, прыехалі на пабыўку.

На арганізаванай пляцоўцы стаяў пах толькі што смажанай бульбы і сала. У беларусаў без гэтага нікуды. Людзі падыходзілі да стала, дзе кожны мог пачаставацца вясковай стравай. У асноўным елі мужчыны, жанчыны ў гэты момант трацілі сямейны бюджэт у лаўках. За некалькі рублёў там можна было набыць добры сувенір.

Не прыйшлося сумаваць і дзецям: для іх працавалі батуты, горкі і палаткі, дзе можна было паласавацца салодкай ватай.

«Свята стала брэндам. Адзначаецца ўжо шосты год. У гэты дзень у Новую Дуброву з’язжаюцца людзі з розных куткоў свету, нават тыя, хто даўно не быў. Адразу радуем прысутных песнямі, потым – дыскатэка. Нас ведаюць не толькі ў Любанскім раёне, за месяц-два тэлефануюць і пытаюць ці будзе мерапрыемства», – адзначыла дырэктар Рачэнскага СДК Ганна Ціханоўская.

Для аднавяскоўцаў гучалі песні Вячаслава Верамейчыка, Святланы Пракаповіч, Валянціны Войцік, Ігара Філіпаўца, сямейнага гурта народнай песні сям’і Ціханоўскіх «Карані». Напэўна, таму і прайшло яно ў амаль дамашняй атмасферы.