Фотарэпартаж: У мінулую суботу на Любаншчыне святкавалі Масленіцу

Народнае гулянне, прымеркаванае да надыходу вясны, адбылося ў гарадскім парку культуры і адпачынку. Скаромныя беларускія прысмакі – бліны са шкваркамі, наварыстая юшка – вельмі былі запатрабаваны і дарослымі, і дзецьмі. Прываблівалі да сябе гандлёвыя палатакі з папкорнам, гарачай кукурузай, салодкімі прысмакамі, сувенірамі і інш.

У канцэртнай праграме, якую падрыхтавалі работнікі ўстаноў культуры для любанчан, гучалі шматлікія віншаванні з надыходам вясны і перапляталіся яны з песнямі і народнымі танцамі. Дарэчы, сёлета першага сакавіка прыпала якраз на завяршальны дзень масленічнага тыдня.

Апафеозам гуляння стала ахвярапрынашальная дзея – спальванне чучала. Па народных павер’ях, агонь ад вогнішча ачышчае ад няшчасцяў і бед, сімвалізуе провады зімы, паляпшэнне ўрадлівасці глебы.

На першы дзень пасля Масленіцы (сёлета гэта 2 сакавіка) пачынаецца Вялікі пост, які працягнецца да Вялікадня.