Дзмітрый Верамейчык – адзін з лепшых механізатараў ААТ «Забалацкі»

У адкрытым акцыянерным таварыстве «Забалацкі» лепшымі механізатарамі на кормараздатчыках па абслугоўванні дойнага статка па выніках работы за 2020 год прызнаны Андрэй Касабуцкі і Дзмітрый Верамейчык. Пра апошняга з названых працаўнікоў распавяла загадчык малочнатаварнай фермы “Обчын-1” Наталля Агіевіч:

– Вялікі ўклад у дасягненне працаўнікамі нашай фермы высокіх надояў, безумоўна, з’яўляецца работа механізатара Дзмітрыя Верамейчыка. Ён вылучаецца высокай выканальніцкай дысцыплінай, зацікаўлены, як і большасць жывёлаводаў нашай фермы, у выніках сумеснай працы.

За плячамі ў Дзмітрыя Верамейчыка 16 гадоў стажу ў галіне сельскай гаспадаркі. Летась механізатар абслугоўваў на ферме і комплексе таварыства 646 дойных кароў. Вытворчасць малака ў групах, якія ён штодня забяспечваў сенажом або сіласам, узрасла больш як на 200 працэнтаў у параўнанні з 2019 годам. Расходаванне кармоў на 100 кілаграмаў малака ў механізатара летась склала 1,1 цэнтнера кармавых адзінак.