Дэпутат палаты прадстаўнікоў Юлія Мурына расказала аб адрозненнях транспартнага падатку ад дарожнага збору

На працягу апошніх некалькіх гадоў актыўна вяліся дыскусіі наконт так званага дарожнага збору, а дакладней дзяржпошліны за выдачу дазволу на допуск транспартнага сродка да ўдзелу ў дарожным руху. Аўтаўладальнікі скардзіліся на высокі памер яго.  Агучваліся розныя прапановы аб замене: уключыць у цану паліва, плаціць прапарцыянальна часу эксплуатацыі аўтамабіля на працягу года і інш. І вось нарэшце парламентарыі разгледзелі новы варыянт – транспартны падатак, які, хутчэй за ўсё, пачне дзейнічаць ужо  з новага года. У чым яго адрозненне ад дарожнага збору, даведаліся ў дэпутата Палаты прадстаўнікоў Нацыянальнага сходу Рэспублікі Беларусь Юліі Мурынай.

– Юлія Георгіеўна, што будзе ўяўляць транспартны падатак?

– Па сутнасці гэта новы віды маёмаснага падатка. І плаціцца ён па факту наяўнасці аўтамабіля, незалежна ад таго, карыстаешся ім ці не. Калі транспартны сродак пастаўлены на ўлік у ДАІ, то і падатак налічыцца.

– Ад чаго залежыць яго памер?

– Ад дазволенай максімальнай масы аўто. Напрыклад, калі яна да 1,5 тоны, то стаўка складзе 61 рубель; звыш 1,5 т, але не больш 1, 75 – 81 руб.  А па дзеючых зараз умовах адпаведна – 81руб., 162 руб. Так што атрымаецца танней.

– Скажыце, а нейкія льготы прадугледжаны пры налічэнні новага віду падатка?

– Так. Для ветэранаў Вялікай Айчыннай вайны, інвалідаў І іІІ групы, пенсіянераў будзе скідка 50 працэнтаў. Яшчэ прапануецца ўвесці яе ў памеры 25% для інвалідаў ІІІ групы. Акрамя таго, грамадзяне, якія знаходзяцца ў цяжкім жыццёвым становішчы, змогуць звярнуцца да мясцовых органаў улады з просьбай зменшыць суму падатку альбо ўвогуле вызваліць ад яго.

– А што датычыць алгарытма аплаты?

– Такі ж, як, напрыклад, падатка на нерухомасць і іншыя віды – адзін раз у год. Патрэбную суму трэба будзе заплаціць да 15 лістапада. Усім уладальнікам транспартных сродкаў папярэдне дашлюць паведамленне з падатковай інспекцыі. Улічваючы, што наступны год пераходны, то для ўсіх прадугледжаны аднолькавы памер – 1 базавая велічыня (з 1 студзеня – 29 рублёў), якую неабходна пералічыць у бюджэт да 15 снежня. А ў 2022-ім давядзецца даплаціць. Дарэчы, тым, хто зніме аўтамабіль з уліку да 1 ліпеня 2021-га плаціць падатак не трэба.

– Хто адкантралюе своечасовасць уплаты падатка?

– Падатковыя органы. У выпадку няўплаты яны будуць налічваць пеню. 

– Юлія Георгіеўна, на што плануецца накіраваць сродкі, атрыманыя ад транспартнага падатка?

– Плануецца сфарміраваць дарожны фонд. І каля паловы яго мяркуецца перадаваць у мясцовыя бюджэты для бягучых і капітальных рамонтаў дарог, каб  прывесці іх у належны стан.