Дэлегаты шостага Усебеларускага народнага сходу нашага раёна праводзяць сустрэчы ў арганізацыях і на прадпрыемствах

Яны інфармуюць работнікаў пра маштабнае мерапрыемства, якое 11-12 лютага ладзілася ў Палацы Рэспублікі, і стала своеасаблівай кропкай адліку новай пяцігодкі.

Так, Таццяна Казлоўская, урач-гігіеніст, загадчык аддзела гігіены Любанскага РЦГЭ, распавяла сваім калегам пра праграму сацыяльна-эканамічнага развіцця краіны на 2021-2025 гады. Зазначыла, што асноўнымі прыярытэтамі вызначаны: шчаслівая сям’я, моцныя рэгіёны, дзяржава-партнёр. І спынілася даволі падрабязна на кожнай з гэтых пазіцый, падзялілася меркаваннямі ўдзельнікаў народнага веча.

Засяродзіла ўвагу Таццяна Генадзьеўна на развіцці сацыяльнай сферы і непасрэдна аховы здароўя. Што найбольш блізка калектыву раённага цэнтра гігіены і эпідэміялогіі. Прысутным было і цікава, і прыемна пачуць, як высока ацэнена работа ўрачоў і ўсяго астатняга персаналу бальніц, амбулаторна-паліклінічных устаноў у час пандэміі. Дэлегат агучыла словы Прэзідэнта пра тое, што ў гісторыю нашай краіны 2020-ы ўвайшоў як год мужнасці беларускіх медыкаў –  яны праявілі не толькі высокі прафесіяналізм, а і лепшыя маральныя якасці, каб дапамагчы пацыентам пераадолець каронавірусную інфекцыю.

–У наступнай пяцігодцы шмат плануецца зрабіць па падтрымцы здароўя насельніцтва і павышэнні працягласці жыцця, – падкрэсліла Т.Г. Казлоўская. – Гэта і развіццё фізкультуры і спорту, сферы паслуг, паляпшэнне якасці пітной вады, забеспячэнне безбар’ернага камфортнага асяроддзя для ўсіх катэгорый грамадзяння і павышэнне ўзроўня жыцця ў цэлым. Вядома, ажыццяўленне новых праектаў і ідэй у сацыяльнай сферы немагчыма без эканамічнага развіцця. Таму прыняты шэраг рашэнняў, якія будуць спрыяць стабільнай рабоце прадпрыемстваў прамысловасці, аграпрамысловага компексу і г.д.

Іншымі словамі, ва ўсіх галінах намечаны станоўчыя пераўтварэнні, але клопат пра чалавека застанецца ранейшым.