“Чырвоныя” гуляюць і выйграюць

Папулярызацыі здаровага ладу жыцця ў нашай краіне надаецца вялікая ўвага. Тым больш прыемна, калі моладзь далучаецца да фізічнай культуры і спорту самастойна, па сваёй асабістай ініцыятыве.

Так адбылося ў Сароцкім сельсавеце, дзе каманда ініцыятыўных маладых людзей з вёсак Рэдкавічы і Шыпілавічы напачатку гэтага года стварылі ўласны футбольны клуб пад назвай “Чырвоная Змена”.

Распрацавалі эмблему клуба, выбраўшы сваімі ахоўнікамі чырвонага і аранжавага драконаў (чырвоны – як сімвал энергіі, удачы і азарту, аранжавы – сівал росквіту, разам – поўная гармонія і сіла адзінства). Упраўленне па адукацыі, спорту і турызму райвыканкама прадаставіла рабятам спартыўную форму. І “чырвоныя” спачатку пачалі гуляць таварыскія матчы з іншымі камандамі Любанскага і Слуцкага раёнаў, а з мая прымаюць удзел у вясковай аматарскай футбольнай лізе.

На сёння “Чырвоная Змена” – гэта 27 спартсменаў-аматараў ва ўзросце ад 16 да 27 гадоў. Хаця каманда маладая, аднак у яе ўжо ёсць свае фанаты: група клуба ў сацыяльнай сетцы “ВК” налічвае больш за 220 чалавек.

Як расказаў Уладзіслаў Дзікун, капітан і адзін з ініцыятараў стварэння “Чырвонай Змены”, далейшая мэта клуба – трапіць у Другую лігу Беларусі па футболе. Вядома, для гэтага маладым спартсменам неабходна падтрымка: пакуль ініцыятыўныя аматары здаровага ладу жыцця звездваюць цяжкасці як са спартыўным інвентаром, спартыўнай формай, так і з месцам, дзе яны маглі б трэніравацца.

А ўбачыць “чырвоных” на полі можна ўжо заўтра. 25 мая ў 18.00 на гарадскім стадыёне г. Любані “Чырвоная Змена” сустрэнецца з любанскім міні-футбольным клубам «Бизон». Прыходзьце на гульню!