Даведаліся, чаму ў Любанскім музеі народнай славы школьнікі размаўлялі па-беларуску

У Міжнародны дзень роднай мовы, які адзначаецца 21 лютага, юныя любанчане дэманстравалі свае веды ў раённым конкурсе-віктарыне «Размаўляем па-беларуску».

Гэта мерапрыемства ўжо не першы год ладзяць супрацоўнікі Любанскай раённай цэнтральнай бібліятэкі імя І.А. Муравейкі. Сёлета пляцоўкай яго правядзення стаў Любанскі музей народнай славы. Заяўкі на ўдзел у конкурсе паступілі ад навучэнцаў васьмі ўстаноў адукацыі: Гімназіі №1 г. Любані, СШ №1 г. Любані, СШ №3 г. Любані, Сароцкай СШ, Рэдкавіцкай СШ, Камунараўскай СШ, Стараюрковіцкай СШ, Загальскай СШ. Кожная каманда складалася з трох чалавек.

Юнакам і дзяўчатам прапанавалі выканаць дзесяць заданняў рознай складанасці: адгадаць загадкі, перакласці слова(ы) і сказ, падабраць антонімы, патлумачыць слова, працягнуць прыказку, запоўніць крыжаванку, скласці слова з прапанаваных літар, расставіць у правільным парадку радкі верша, назваць святы народнага календара.

Мяркуеце, лёгка? Памыляецеся. Вось, напрыклад, паспрабуйце адгадаць загадку: «Ляжыць калода сярод балота: не гніе і не сохне». А ці зможаце знайсці беларускія адпаведнікі рускім словам «сапожник», «клёст», патлумачыць слова «апоўзіны»? Толькі асобныя каманды здолелі правільна працягнуць прыказку «За разумнаю галавою і рукам…» (*усе адказы змешчаны напрыканцы матэрыяла).

Правільнасць выканання заданняў ацэньвала журы на чале з настаўніцай пачатковых класаў Соснаўскай СШ №1 Людмілай Варвашэвіч. А вось і вынікі: трэцяе месца ў віктарыне заняла каманда «Сузор'е надзей» СШ №1 г. Любані, другое – каманда «Хлопцы-ўмельцы» Староюрковіцкай СШ, першае – каманда «Несцерка» Гімназіі №1 г. Любані. Яны атрымалі дыпломы і падарункі ад аддзела ідэалагічнай работы, культуры і па справах моладзі райвыканкама. Усе астатнія ўдзельнікі заахвочаны сувенірамі.

Правер сябе

Адказы на заданні: *язык, *шавец, *крыжадзюб, *дубцы, якімі ўмацоўваецца сена ў стозе, *…лёгка.