Весяліліся ад душы

Найбольш актыўныя рабяты наведалі не адно і не два такія прадстаўленні – і паўсюль было весела і цікава, кожны канцэрт і ранішнік адрозніваўся ад іншых. Свой варыянт навагодняй дзеі падрыхтавалі і работнікі Любанскай раённай дзіцячай бібліятэкі сумесна з аддзелам бібліятэчнага маркетынгу Любанскай РЦБ.

26, 27 і 28 снежня бібліятэкары запрасілі ўсіх жадаючых у Любанскі раённы Цэнтр культуры, дзе размясцілася імправізаваная рэзідэнцыя Дзеда Мароза. Разам з Бабай Ягой, Лесуном, Свінкай Машай і, вядома, Дзедам Марозам і Снягуркай рабяты вадзілі карагоды, адгадвалі загадкі, спявалі, танчылі і весяліліся. А напрыканцы дзеі расказвалі вершы і атрымлівалі за гэта цукеркі.

Усяго за тры дні ў мерапрыемстве прынялі ўдзел каля сотні рабят ва ўзросце ад двух да дзесяці гадоў. У прыватнасці, свята наведалі навучэнцы СШ №1 і Гімназіі №1 г. Любані, а таксама дзеці работнікаў дарожнага рамонтна-будаўнічага ўпраўлення №193 і Любанскай райбальніцы.