У Любанскай ДШМ адкрылася рэтраспектыўная фотавыстаўка “Край славы партызанскай, край святой любові”

“Гартаю старонкі старых блакнотаў, разглядаю фотаздымкі. Перад вачыма паўстае тое, што шмат гадоў таму адлюстравалася на фотастужках. З рэдакцыйнымі заданнямі не раз бываў у Любані, у вёсках гэтага маляўнічага края, на партызанскім востраве Зыслаў. Не ведаю, ці памятаюць мяне людзі, з якімі мне давялося тут пазнаёміцца. Але я (варта адкрыць толькі старонкі фотаархіва) адразу ўзгадваю твары субяседнікаў і нібы чую іх галасы”, – так цёпла і шчыра выказаўся вядомы фотажурналіст Яўген Пясецкі.

Яго здымкі – гэта цэлая гісторыя, шматгранная і захапляльная. У ёй арганічна пераплецены краявіды дзіўнай прыгажосці, знакавыя падзеі рэчаіснасці, незвычайныя лёсы суайчыннікаў. Нават цяжка ўявіць і падлічыць, колькі іх накоплена за амаль 60 гадоў прафесійнай і творчай дзейнасці?! Але прыемна, што пачэснае месца займаюць фотаработы, прысвечаныя Любаншчыне: легендарнаму востраву Зыславу, апетай Купалам рэчцы Арэсе, жыхарам-жыццялюбам і рупліўцам, слыннаму земляку Івану Муравейку, мужным абаронцам Айчыны… І яны прасякнуты асаблівай энергетыкай, незвычайным каларытам.

У тым, да слова, змаглі ўпэўніцца ўсе, хто завітаў на ўрачыстае адкрыццё рэтраспектыўнай фотавыстаўкі пад мілагучнай назвай “Край славы партызанскай, край святой любові”, што падрыхтавана ў Любанскай дзіцячай школе мастацтваў да 75-годдзя таленавітага творцы. Мерапрыемства прайшло ў душэўнай атмасферы. Загадчык тэатральнага аддзялення Васіль Каткавец, апантаны краязнаўца Анатоль Вялічка, супрацоўнік музея народнай славы Сяргей Квіткевіч, якія не раз сустракаліся з Яўгенам Пясецкім і не першы год супрацоўнічаюць, прыгадалі цікавыя моманты іх сумесных вандровак, сустрэч, размоў. Распавялі пра майстэрства Яўгена Пясецкага, як яго часта называюць, старажыла фотажурналістыкі, паэтызаваць уласныя здымкі і пра тое, што ён з’яўляецца заснавальнікам рубрыкі «Фотаслова», аўтарам зборніка «Кола дзён», у якім кожны верш напоўнены любоўю да роднай старонкі, павагай да яе працавітых людзей, пяшчотай да ўсяго жывога на зямлі. Асобныя творы, дарэчы, прагучалі – іх эмацыянальна і пранікнёна, па-дзіцячы шчыра прачыталі юныя акцёры, навучэнцы Любанскай ДШМ.

Падсумоўваючы, начальнік аддзела ідэалагічнай работы, культуры і па справах моладзі Таццяна Аляксеева зазначыла:

– Багатая творчая спадчына майстра сведчыць: чалавек ён плённы і нераўнадушны да ўсяго, што адбываецца вакол. Праз прызму аб’ектыву і з дапамогай цудадзейнага слова ён захаваў у памяці хроніку штодзённага жыцця многіх рэгіёнаў Сінявокай, і ў тым ліку Любаншчыны, краю славы партызанскай. Яўген Пясецкі валодае асаблівым талентам – бачыць незвычайнае ў звычайным. Умее не толькі захапляцца тым, што акаляе, а і адлюстроўваць гэта ў сваіх творах і фотаздымках. Нездарма яны кранаюць душу і сэрца, нібы няктар, насычаюць асалодай і цеплынёй. З’яўляюцца выдатным пасылам для ўсіх нас – радавацца таму, што побач, цаніць гэта, захоўваць, каб пакінуць пасля добры след.