“Пятровіца” запрашае гасцей

Традыцыйна з усёй Беларусі, а таксама з замежжа збіраецца моладзь, каб адчуць хараство народных песень, навучыцца танцавальнай манеры, асвоіць разнастайныя віды прыкладнога мастацтва, зведаць хаця б маленькую частку багатай скарбонкі Любаншчыны.

У ролі галоўнага настаўніка выступае мастацкі кіраўнік узорнага фальклорнага калектыву “Верабейкі”, этнахарэограф Сяргей Выскварка. Кожны ранак праходзяць трэніроўні голасу з Вольгай Емельянчык, запланавана рэканструкцыя абрадавых дзей з гуртом “Павалякі”, творчасць якога ўключана ў Дзяржаўны спіс гіторыка-культурных каштоўнасцей Рэспублікі Беларусь.

Арганізатары свята лічаць “Пятровіцу” інтэрактыўным паглыбленнем ў традыцыйную народную культуру. Гэта вандраванне па этнаграфічных куточках Любанскага краю, знаёмства з носьбітамі народных традыцый, падарожжы фальклорнымі сцежкамі ў вясковыя хаты і падворкі,  майстар-класы па вышыўцы, выцінанцы, а таксама смачныя вясковыя сняданкі, абеды і вячэры, час праведзены з сябрамі-аднадумцамі. “Пятровіца” – выдатная магчымасць адпачыць ад гарадскога тлуму ў полі, лузе, лесе, на рацэ.

Вікторыя ДЗЯШКОВІЧ.