На працягу двух дзён у Любанскай дзіцячай школе мастацтваў дзейнічала творчая акадэмія "StArt"

Заняткі з рабятамі, якія займаюцца на розных аддзяленнях установы, праводзілі не толькі настаўнікі яе, а і выкладчыкі з Мінскага дзяржаўнага каледжа мастацтваў, універсітэта культуры і мастацтваў і інш. Яны ладзілі вучэбныя практычныя трэнінгі, цікавыя гутаркі,  рыхтавалі юных музыкантаў і вакалістаў да выступленняў. А чаму навучыліся яны, гледачы змаглі ўбачыць і ацаніць на выніковым  гала-канцэрце.

Удзельнікі яго прадставілі цудоўныя творчыя нумары, якія прыйшліся да спадобы прысутным. Яны віталі артыстаў, як навучэнцаў, так і педагогаў, лаўрэатаў шматлікіх рэспубліканскіх і міжнародных конкурсаў Уладзіслава Плігаўку, Аксану Кузняцову і г.д., гучнымі апладысментамі і выгукамі "Брава!".

Падсумоўваючы вынікі, дырэктар школы мастацтваў Васіль Стэльмах зазначыў, што творчая акадэмія - гэта выдатны праект, які дазволіў глыбей раскрыць здольнасці навучэнцаў, уведаць іх інтарэсы. І падзякаваў усім, хто падтрымаў такую ініцыятыву, дапамог у яе рэалізацыі.