Любаншчына далучылася да абласной акцыі «Міншчына культурная – за Беларусь!»

На мінулым тыдні праводзіліся дні адкрытых дзвярэй на прадпрыемствах. Прадстаўнікі ўстаноў культуры прэзентавалі сваю творчую дзейнасць.

А заключнае мерапрыемства ладзілася ў раённым цэнтры культуры. «Горад захапленняў» гасцінна расчыніў дзверы для юных любанчан. Навучэнцы трох гарадскіх устаноў адукацыі і Сароцкай школы завіталі, каб пазнаёміцца, якія аб’яднанні па інтарэсах, творчыя калектывы дзейнічаюць на базе РЦК, па якіх накірунках можна займацца ў дзіцячай школе мастацтваў. І пасля абраць для сябе занятак па душы.

З цікавасцю рабяты глядзелі выступленні ўзорнага фальклорнага ансамблю «Верабейкі», вакальнага калектыву «Спадчына»,  вучаніцы тэатральнага аддзялення Любанскай ДШМ Валерыі Караньковай і іншых. Даведаліся пра работу відэастудыі «Любань ТВ», удзельнікі якой ствараюць сацыяльныя відэаролікі. Юнакі і дзяўчаты самі пішуць сцэнарыі, размяркоўваюць ролі, рэалізоўваюць свае ідэі. А навуковы супрацоўнік музея народнай славы Сяргей Квіткевіч падзяліўся з прысутнымі сваім захапленнем – фатаграфаваннем і напісаннем вершаваных подпісаў да здымкаў, падчас жартаўлівых.

Пасля разнастайнай канцэртнай праграмы навучэнцы школ не спяшаліся разыходзіцца. Яны дзяліліся сваімі думкамі наконт убачанага. Прычым не толькі вусна, а і пісьмова. І паперкі з запісамі прымацоўвалі да дрэва ўражанняў, размешчанага ў фае цэнтра культуры. Без сумнення, некаторыя з рабят, пабачыўшы творчыя нумары, у тым ліку і з удзелам аднагодкаў, таксама далучацца да іх будуць бавіць  вольны час з карысцю.