Любанчане прынялі ўдзел у фестывалі беларускай песні і паэзіі ў Маладзечна

Грандыёзны юбілейны фестываль беларускай песні і паэзіі ў Маладзечна сабраў гасцей з усіх рэгіёнаў Міншчыны і розных куткоў усёй нашай краіны. Любанчане таксама прынялі ўдзел у творчым форуме.

У “Горадзе майстроў” была падрыхтавана цікавая экспазіцыя, якая адлюстроўвала самабытнасць нашага краю, яго традыцыі, каларыт. Прычым прапанавалася не толькі палюбавацца разнастайнымі вырабамі дэкарытыўна-прыкладнога мастацтва, а і набыць іх. Ды яшчэ  паспрабаваць самім зрабіць нешта падобнае: напрыклад, Ірына Яскевіч праводзіла для жадаючых майстар-клас па ткацтве. Фальклорны калектыў “Шчодрык” Рачэнскага сельскага Дома культуры выканаў цудоўныя народныя песні, якія гучалі пранікнёна, здаецца, ад самага сэрца, атульвалі цеплынёй.  А супрацоўніцы раённай бібліятэкі аформілі кніжную паліцу “Зорка Івана Муравейкі”, пазнаёмілі гасцей фестывалю са слаўным сынам любанскай зямлі, які пакінуў багатую літаратурную спадчыну, цікавасць да якой не згасне і праз гады.

Здзіўлялі сваімі майстар-класамі, выставамі, выступленнямі і прадстаўнікі іншых раёнаў. Ды і ўвогуле праграма творчага форуму была насычанай. На плошчы горада і суседніх вуліцах працавала шмат пляцовак, дзе праходзілі канцэрты, тэатральныя пастаноўкі і г.д.  Усюды гучалі беларуская песня і беларускае слова з вуснаў як прафесіянальных калектываў і выканаўцаў, так і зусім юных.

Па традыцыі цэнтральнай падзеяй фестывалю быў нацыянальны конкурс маладых спевакоў беларускай эстраднай песні. Гран-пры яго і  спецыяльны прыз імя Уладзіміра Мулявіна атрымала вакалістка з Віцебска Ніколь Фургал. А фінальным акордам форума стаў яркі галаканцэрт “Насустрач шлягерам” у Летнім амфітэатры. Свае лепшыя нумары дарылі гледачам зоркі айчыннай эстрады – Жанэт, Алена Ланская, Аўра і іншыя, а таксама пераможцы конкурсу маладых выканаўцаў розных гадоў.