Аддзел традыцыйных рамёстваў і промыслаў Любанскага музея народнай славы прэзентаваў выставу «Прабабуліна вяселле»

Супрацоўнікі музея сумесна з раённым Цэнтрам культуры падрыхтавалі для наведвальнікаў цікавую экспазіцыю. Складаецца яна з трох частак, кожная з іх расказвае пра пэўныя вясельныя абрады і традыцыі. Асаблівая ўвага нададзена вясельным галаўным убранням – бадай, цэнтральнаму атрыбуту вобразу маладой. У 28 вянках, што прадстаўлены ў зале, пераплецены кветкі і гісторыя ад 30-х і да пачатку 60-х гадоў мінулага стагоддзя. Гэтыя шлюбныя ўпрыгожанні адноўлены дзякуючы народнаму майстру Беларусі Раісе Вальковай з вёскі Кузьмічы Камунараўскага сельсавета. Раіса Міхайлаўна прыняла непасрэдны ўдзел у адкрыцці выставы, шмат што распавяла пра ўласна створаную калекцыю галаўных убранняў. У мінулым, напрыклад, вясельныя вянкі звычайна плялі ў дзявочы вечар, падчас якога спявалі песні ў гонар той, што развітвалася з дзявочым жыццём. Кожны вяночак адлюстроўваў, як цяпер кажуць, сацыяльны статус. Калі ў ім пераважалі чырвоныя кветкі – гэта азначала дзяўчына яна з заможнай сям’і, калі ж былі ўплецены толькі белыя краскі – азначала, што да шлюбу ідзе сіраціна – не мае ні маці, ні бацькі. Калі ў маладой быў хтосьці адзін з бацькоў, то дазвалялася да белага колеру дадаць крыху іншай фарбы.

Шмат цікавых зветак утрымлівае экспазіцыя пра вясельны каравай – адзін з абавязковых атрыбутаў вяселля.

Як зазначыла загадчык аддзела традыцыйных рамёстваў і промыслаў, старшы навуковы супрацоўнік Алена Квіткевіч, у ходзе страрэння выставы з’яўвілася ідэя паказаць і вясельны поезд – конную павозку, упрыгожаную кветкамі або яловымі лапкамі, на якой ехалі малады з маладою. Вядома, побач з імі былі і музыкі.

– Высветліўся цікавы факт: апошні народны музычны гурт, вельмі папулярны на вяселлях на Любаншчыне ў пасляваенныя гады, быў з вёскі Плюсна. Кіраваў ім Чэсь Усцінавіч Бяскосты – выдатны музыкант і майстар па вырабе музычных інструментаў. У гурт уваходзілі цымбаліст, гарманіст, скрыпач, барабаншчык і, як гэта не дзіўна, кларнеціст, – распавяла Алена Аляксандраўна.

Акрамя названы інструментаў, экспазіцыя змяшчае шмат іншых рэчаў, якія выкарыстоўваліся падчас вясельных абрадаў. Асаблівае месца займаюць даматканыя дываны-посцілкі, ручнікі, настольніцы, наміткі, паясы, упрыгожанні…

Выстава працуе і сёння, думаю, зацікавіць яна можа наведвальніка любога ўзросту.