Каб гучала беларуская песня


Мабыць, не памылюся, калі скажу, што жыхары аграгарадка Рачэнь, навакольных населеных пунктаў, ды наогул многія любанчане, з асаблівай цікавасцю сочаць за фальклорным шоу «Хата на хату», якое выходзіць на тэлеканале «Беларусь 3». Прычынай з’яўляецца не толькі любоў да спадчыны беларускага народа, але і ўдзел у праекце сям’і Ціханоўскіх з аграгарадка Рачэнь: Уладзіміра і Тамары, іх дочак Ілоны і Ганны, а таксама мужа і дачкі апошняй.

Шоу зацікавіла многіх. Геаграфія яго ахапіла ўсю Беларусь. Удзел у перадачы прымалі сем’і з Гомельскай, Магілёўскай, Гродзенскай, Брэсцкай і Мінскай абласцей. Сталічны рэгіён, акрамя Ціханоўскіх, прадстаўляла яшчэ сям’я Клімовіч з Бярэзінскага раёна. Цікава, што ўзрост самага пажылога ўдзельніка – 91 год, а самага маленькага – на дзевяноста менш.

«Хата на хату» складаецца з трох тураў. У адборачным вядучыя Іван Крук і Ларыса Мятлеўская наведалі 10 яркіх, таленавітых музыкальных сямей, якія праявілі сваю гасціннасць, праспявалі песні і пазнаёмілі з традыцыямі рэгіёну.

Пуцёўку ў другі тур атрымалі восем, якіх вызначыла кампетэнтнае журы. у склад яго ўвайшлі Таццяна Лазоўская, Анатоль Ярмоленка, Валянціна Гладкая, Аляксандр Елісеенкаў. На гэты раз удзельнікам неабходна было праявіць сваю спеўнасць у так званых музычных батлах. Па выніках спаборніцтваў чатыры сям’і былі запрошаны ў сталіцу, дзе адбудзецца фінальны канцэрт з зоркамі беларускай эстрады і фальклорных калектываў. Трэба адзначыць, што ва ўсіх турах Ціханоўскія атрымалі высокую адзнаку.

Ідэя паўдзельнічаць у праекце з’явілася ў Ганны. На сямейным савеце яе аднагалосна ўсе падтрымалі. І пачалася падрыхтоўка: неабходна было выбраць касцюмы, песенны рэпертуар, прыгатаваць нацыянальныя стравы. Апошні клопат лёг на плечы Тамары Андрэеўны. А вось адзенне ўдзельнікаў шоу аздобіў вышыўкай Уладзімір Аляксандравіч. Ён жа зрабіў сваімі рукамі і саламяны капялюш, які дапаўняў мужчынскі строй. Жанчынам своеасабліва, у мясцовай манеры завязалі хусткі.

Дарэчы, высокі ўзровень майстэрства саломапляцення У.А. Ціханоўскага адзначыў Іван Крук. Асабліва ўразіла яго лялька-неразлучніца. Убачыць яе можна ў Атрадненскім сельскім Доме культуры, дзе аформлена аўтарская выстава саламяных вырабаў «Лялечны карагод». Падкрэслю: умельцу з Рачэні ў 2010 годзе прысвоена званне народнага майстра Беларусі.

рэпертуар сямейнага гурта даволі разнастайны. У перадачы гучалі масленічныя песні, характэрныя для Любаншчыны, а таксама пра вёску, працу. Асабліва спадабалася вядучым песня «Пчолы, мае пчолы».

Кожная сям’я, удзельніца конкурсу, мела сваю адметнасць. Ціханоўскія пакарылі журы выкананнем аўтэнтычнай песні. Безумоўна, у гэтай справе роўных Уладзіміру Аляксандравічу складана знайсці.

– Родам я з Магілёўшчыны, – распавядае кіраўнік сямейнага гурта «Карані». – Гэта песенны край. Там спяваюць усе: малыя, дарослыя, пажылыя. У маёй сям’і таксама ўсе спявалі. Мабыць, любоў да музыкі мне перадалася на генетычным узроўні. У доме часта гучала народная песня ў выкананні маёй бабулі. Я быў яшчэ малы. Нават і чытаць не ўмеў, а словы запамінаў на ляту. Яны самі ўліваліся ў маю душу, западалі раз і назаўсёды. Песня заварожвае мяне. Яна для мяне душэўныя лекі, элексір маладосці. На сцэне я жыву. У выкананні аўтэнтычнай песні стараюся захаваць мелодыку, танальнасць, каларыт мясцовага дыялектнага слова. Хацеў бы перадаць сваё майстэрства і ўнучцы Есеніі, якая таксама была ўдзельніцай конкурсу.

Шмат добрых слоў сказала пра сямейны гурт «Карані» Таццяна Лазоўская. Былі адзначаны галасістасць, артыстызм Ілоны. Не аказалася роўных у другім туры Ігару Філіпаўцу (мужу Ганны), які выйграў музычны батл у сям’і Еўдакімовіч. А як сыпаў ён беларускімі прыказкамі! За самабытнасць, талент, яркае выступленне салістка калектыву «Бяседа» ўручыла сям’і Ціханоўскіх спецыяльны прыз. Сваім выкананнем аўтэнтычнай вясельнай песні Уладзімір Аляксандравіч пакарыў усіх. Таму ў намінацыі «Лепшыя мужчынскія спевы» ён адзначаны дыпломам.

Віншуем сям’ю Ціханоўскіх з цудоўным выступленнем у праекце.

Хто ж атрымае галоўны прыз – адпачынак у санаторыі «Нарачанка»? Будзем сачыць за тэлеперадачай.

Адназначна, у фальклорным шоу «Хата на хату» ўсе выступілі годна. Кожны адшліфаваў сваё майстэрства, узбагаціўся цікавымі ідэямі, знайшоў новых сяброў. Галоўнае, што аб’яднала ўдзельнікаў, – беларуская песня. Яна гучала на розныя лады, у суправаджэнні музычных інструментаў… Канкурсанты жылі песняй.

Вялікі дзякуй вам за прыемныя ўражанні.

Ірына ЛЕНСКАЯ.

Ваш отзыв

1 октября – день пожилых людей 1 сентября – день знаний 4 октября – день учителя 5 кастрычніка – дзень работнікаў крымінальнага вышуку 6 октября – день архивиста 20 сентября – день работников леса 25 октября – день автомобилиста и дорожника 26 АПРЕЛЯ – ДЕНЬ ЧЕРНОБЫЛЬСКОЙ ТРАГЕДИИ 26 июня – день работников прокуратуры 70-летие великой победы 2015 – год молодежи Аздараўленне Актуально Акцыя Ахова працы В комитете госконтроля Ганаруся сваёй прафесіяй Год культуры Да 450-годдзя Любані Демография День работников сельского хозяйства и перерабатывающей промышленности Дэмаграфія Единый день информирования За здаровы лад жыцця Конкурс «Перамога ў нашай памяці жыве» Летняе аздараўленне Людзі і справы Международные связи Народ и власть Наши достижения Обратная связь Оздоровление ПРАЕКТ «ЖЫВЕ МАЯ ВЁСКА» Парламентский вестник Патрыятычнае выхаванне Пресс-тур губернатора Минской области Профилактика правонарушений Профориентация Святы Служба занятости Служу отечеству! Справы вясковыя Творчество Ураджай-2016 Цікавая экскурсія