У парку культуры і адпачынку горада Любані адсвяткавалі Першамай

Якіх толькі забаў не было для дзятвы! Малодшыя рабяты каталіся на арэлях, скакалі на батутах, старэйшыя спаборнічалі за права быць лідарамі па лазертагу, праходзілі розныя іспыты ў дзіцячым гарадку і атрымлівалі за гэта фішкі, якія пасля абменьвалі на падарункі. Функцыянавалі таксама прафсаюзныя інтэрактыўныя пляцоўкі. Карацей кажучы, не сумаваў ніхто.

Аднак, бадай, галоўная дзея адбывалася на сцэне. Па традыцыі з нагоды свята працы адбылося ўшаноўванне лепшых работнікаў устаноў, арганізацый, а таксама любанчан, якія ўжо знаходзяцца на заслужаным адпачынку, але ў свой час шчыравалі ў розных сферах і ўносілі важкі ўклад у сацыяльна-эканамічнае развіццё Любаншчыны. Словы ўдзячнасці за іх плён, а таксама найлепшыя віншаванні ўсім прысутным у парку адрасаваў старшыня раённага аб’яднання прафсаюзаў Мікалай
Кукраш. Ён таксама зазначыў, што на працягу многіх гадоў гэта свята – сімвал узаемападтрымкі, міру, згоды сярод лю-дзей розных прафесій і пакаленняў. Чалавек працы, прафесіянал сваёй справы заўсёды карыстаўся заслужанай павагай у грамадстве. І сёння мы ганарымся такімі людзьмі, шануем іх, аддаём даніну пашаны за стваральнасць і плён. Мікалай Адамавіч пажадаў, каб у кожным доме і ў цэлым у нашай краіне панавалі разуменне і шчасце.

Да цёплых слоў далучыліся і лідары галіновых прафсаюзаў. Яны падрыхтавалі дыпломы, падарункі, грашовыя прэміі. Адзін за адным па ўзнагароды на сцэну ўзнімаліся працаўнікі розных сфер. На іх тварах свяціліся ўсмешкі, і па ўсім было відаць, што яны гатовы і далей заўзята шчыраваць, сваім стараннем мацаваць дабрабыт арганізацый і прадпрыемстваў.