v тэатральны фестываль сярод устаноў дашкольнага выхавання "За кулісамі дзяцінства" – казкі

Немагчыма сабе ўявіць жыццё рабят у дзіцячым садзе без вясёлых забаў, шумных святаў, цікавых гульняў. Асаблівая роля ў развіцці дашкольнікаў належыць тэатру – аднаму з самых яркіх відаў мастацтва. Менавіта таму па ініцыятыве ўпраўлення па адукацыі, спорце і турызме 17 мая ў Любанскай дзіцячай школе мастацтваў прайшоў v тэатральны фестываль сярод устаноў дашкольнага выхавання. На гэты раз ён праводзіўся ў два этапы. У першым прынялі ўдзел 17 устаноў, якія прадставілі відэаролікі сваіх пастановак. Дарэчы, адной з умоў было тое, што казка павінна быць на беларускай мове. 7 удзельнікаў выйшлі ў 2 тур, каб прадэманстраваць свой талент гледачам і журы. Гэта Сароцкі яслі-сад (казка “Пшанічны каласок”), Урэцкі яслі-сад №10 (казка “Мёд і пчолы”), Малагарадзячыцкі вучэбна-вытворчы камбінат дзіцячы сад – сярэдняя школа (казка “Каза-манюка”), дзіцячыя сады горада Любані: №6 (казка “Мама для маманяці”), №4 (казка “Як варона салаўём прыкінулася”), №5 (казка “Зайчаня”), №3 (казка “Светлафор”).

На пачатку мерапрыемства галоўны спецыяліст упраўлення па адукацыі, спорце і турызме Алена Кандраценя зазначыла, што тэатр – гэта свята, радасць. Ён развівае ўяўленне і фантазію, садзейнічае творчаму развіццю дзіцяці, фарміруе культуру. Алена Віктараўна павіншавала рабят, падзякавала педагогам за іх працу.

Мерапрыемства атрымалася яркім, забаўным - святам казкі, творчасці, тэатральнага мастацтва.Цудоўныя касцюмы, дэкарацыі, музычнае суправаджэнне,танцавальныя нумары – усё, як у сапраўдным тэатры.Усе калектывы былі непаўторнымі, артыстычнымі. У кожнай пастаноўцы – свая ізюмінка. Маленькія акцёры лёгка, умела і чулліва перадавалі стан і настрой сваіх герояў, здзіўлялі і радавалі гледачоў, якія кожнае выступленне суправаджалі бурай эмоцый і громкімі апладысментамі.Педагогі праявілі вынаходлівасць, крэатыўнасць у падрыхтоўцы спектакляў, некаторыя самі станавіліся ўдзельнікамі дзеі.

Журы, якое ўзначаліла Е.В. Кандраценя, было складана ацаніць выступленні, таму што ўсе былі дастойны самых высокіх адзнак. І ўсё ж Дыпломамі І, ІІ, ІІІ ступеней узнагароджаны калектывы гарадскіх яслей-садоў №6, №5, №3 адпаведна. Акрамя таго, Сароцкі яслі-сад адзначаны ў намінацыі “Лепшы мастацкі дызайн”, Урэцкі яслі-сад атрымаў прыз глядацкіх сімпатый, Малагарадзячыцкі ВВК ДС-СШ – прыз журы.За лепшую акцёрскую ролю ўзнагароджана Юдзіцкая Соф’я (Малагарадзячыцкі ВВК), а таксама адзначаны і іншыя выканаўцы.

Напрыканцы хочацца пажадаць выхаванцам дашкольных устаноў далейшых творчых поспехаў, а педагогам – невычэрпнага натхнення. Няхай і надалей фестываль радуе аматараў тэатра, а выхаванцы садкоў развіваюць свой талент.

Ірына Беразоўская.

Фота аўтара.

Версия для печати

К списку записей раздела>>