Узорны фальклорны ансамбль «Верабейкі» Любанскага раённага Цэнтра культуры на мінулым тыдні адсвяткаваў свой 25-гадовы юбілей з часу стварэння

Гады праляцелі – не адно пакаленне дзяцей з творчага калектыву вырасла, разляцеліся дзяўчаты і хлопцы, нібы птушкі з гнязда. Нязменным застаецца толькі кіраўнік «Верабейкаў» Сяргей Выс-кварка. Менавіта Сяргей Георгіевіч быў вядучым святочнай праграмы, што адбылася з нагоды юбілею яго дзецішча ў раённым Цэнтры культуры. Падчас асноўнай дзеі «Верабейкі» ў прыгожых нацыянальных строях прадэманстравалі ўменне выконваць народныя танцы. Выступілі розныя ўзроставыя групы, ад малых да дарослых, хараводзілі разам. І сам кіраўнік калектыву прыняў удзел у некалькіх каленах – даў майстар-клас. Сяргей Георгіевіч – прафесіянал у сваёй справе, шмат гадоў узнаўляе з небыцця і ашчадна захоўвае народныя традыцыі, асаблівасці любанскай культуры. У дзяцей ён выхоўвае павагу да спадчыны продкаў. За шматгадовую плённую працу аддзел ідэалагічнай работы, культуры і па справах моладзі Любанскага райвыканкама ўручыў яму Ганаровую грамату. Узнагароды атрымалі і акампаніятары – Васіль Семашкевіч і Мікалай Юніцкі. Дыпломамі былі адзначаны некаторыя выхаванцы з «Верабейкаў», што для большасці з іх стала прыемным сюрпрызам.

У дзень святкавання юбілею ўдзельнікі ўзорнага фальклорнага ансамбля прынялі вялікую колькасць віншаванняў: ад аддзела ідэалагічнай работы, культуры і па справах моладзі райвыканкама, работнікаў РЦК, протаіерэя Аляксандра Драгуна, Любанскага музея народнай славы, дзіцячай школы мастацтваў. Усяго найлепшага зычылі і падарылі свае музычныя нумары беларусы з суседняй краіны – фальклорны гурт «Жэмэрва» з Польшчы і іншыя.

Думаецца, гледачы атрымалі сапраўдную асалоду і задавальненне не толькі ад праграмы, але і ад атмасферы дабрыні, што ўсталявалася на свяце. Не абышлося, канечне, і без юбілейнага каравая, прысмакаў, сувеніраў, кветак.

У сваю чаргу і мы, работнікі раёнкі, жадаем Сяргею Георгіевічу і яго выхаванцам смела ісці наперад, спасцігаць новае, нязведанае. задавальнення вам ад працы, новых творчых поспехаў, удачы і цікавых гастроляў!

Елена

Радкевич

Версия для печати

К списку записей раздела>>