На Любаншчыне назіраецца змяншэнне плошчы вырастання баршчэўніку Сасноўскага

Гэты факт канстатавалі ў раённай інспекцыі прыродных рэсурсаў і аховы навакольнага асяроддзя. Калі яшчэ пяць гадоў назад дадзены від інвазіўнай (ад лат. іnvasio – нашэсце, напад, набег; насілле, насільны захоп) расліны займаў плошчу ў адзін гектар, то цяпер – 0,71 га.

Практычна 90 працэнтаў земляў, «захопленых» баршчэўнікам Сасноўскага, знаходзяцца на тэрыторыі Рачэнскага сельскага савета. Так, многа асяродкаў яго вырастання паблізу вёсак Дунцы і Старая Дуброва.

Карыстальнікі зямельных участкаў і вод-ных аб’ектаў, на тэрыторыі якіх аблюбаваў сабе месца баршчэўнік Сасноўскага, абавязаны праводзіць мерапрыемствы па яго знішчэнні. У прыватнасці, гаворка ідзе пра прадпрыемствы Міністэрства лясной гаспадаркі, Міністэрства транспарту і камунікацый, Міністэрства сельскай гаспадаркі і хачавання, Міністэрства энергетыкі Рэспублікі Беларусь.

Зараз – самы час гербіцыднай апрацоўкі ўзыходаў інвазіўнай расліны. Хімічныя прэпараты выклікаюць яе гібель. Яшчэ адзін эфектыўны метад барацьбы з баршчэўнікам Сасноўскага – скошванне яго парасткаў. Як правіла, дадзеныя дзеянні неабходна праводзіць некалькі разоў за сезон. Аднак, які б метад барацьбы ні быў абраны, галоўнае – не дапусціць цвіцення расліны-агрэсара і наступнага выспявання насення.

Для даведкі

Згодна з дадзенымі Мінпрыроды, па стане на 1 лістапада 2018 года на тэрыторыі Беларусі баршчэўнік вырастае на плошчы 3675,69 га, у тым ліку 364,64 га прыпадаюць на Міншчыну.

У сталічнай вобласці найбольшая плошча вырастання баршчэўніку зафіксавана ў Лагойскім (115,74 га), Мінскім (41,1), Валожынскім (40,96) і Слуцкім (29,45) раёнах; найменшая – у Бярэзінскім (0,15), Салігорскім (0,18), Любанскім (0,71) і Клецкім (0,95).