Версія для друку
Памер шрыфту
+
Друк

І работніца, і гаспадыня цудоўная

 
У чарговы раз прафесіянальнае свята калектыў Любанскага філіяла адкрытага акцыянернага таварыства «Слуцкі сыраробны камбінат» сустрэў з важкімі вытворчымі паказчыкамі. І ў тым, зразумела, заслуга кожнага работніка.

 

Свой уклад у агульную справу штодзень ужо на працягу дзясятка гадоў уносіць і Алена Галка. Пачынала працоўную дзейнасць у цэху па вытворчасці цэльнамалочнай прадукцыі. А праз чатыры гады змяніла яго на маслацэх. Там шчыруе і зараз масларобам 3 разраду. На выдатна засвоіла ўвесь тэхналагічны працэс вырабу масла, яго ўпакоўкі. Можна сказаць, любую аперацыю Алена Мікалаеўна можа выканаць амаль з закрытымі вачамі. І робіць усё якасна, разумее: ад старання кожнага залежыць вельмі многае – вытворчыя паказчыкі, якасць прадукцыі, рэпутацыя завода ў цэлым.

За высокую свядомасць, дысцыплінаванасць, руплівасць жанчыну на прадпрыемстве лічаць добрай работніцай, паважаюць як шчырага, неабыякавага чалавека. Яна аптыміст па характары, сваёй бадзёрасцю, станоўчай энергіяй заражае і калег; заўсёды побач з тымі, каму патрэбна падтрымка.

— А чым у вольны час любіце займацца? — цікаўлюся ў Алены Мікалаеўны.

— Як і ўсе, хатнія справы выконваю, – распавяла А.М. Галка. – Вядома ж, стараюся родных балаваць рознымі прысмакамі. Вельмі падабаецца хадзіць у лес у грыбы і ягады, таму летам і восенню абавязкова, калі ёсць магчымасць, з мужам, сынамі Арцёмам і Прохарам накіроўваемся на «ціхае» паляванне. І ўвогуле ў нас ужо склалася сямейная традыцыя – весці актыўны лад жыцця, адпачываць на прыродзе, разам займацца спортам. Гэта і для здароўя карысна, і яднае нас.

 

Вы можаце знайсці гэту старонку па наступным адрасе:
http://lluban.by/by/economy-by/view/i-rabotnitsa-i-gaspadynja-tsudounaja-11165/
Афiцыйны сайт газеты Любанскага раёна Усе правы абаронены © 2018 Голас Любаншчыны. Распрацоўка УП "БелТА"