Акцэнт на важныя пытанні. Напярэдадні адзінага дня інфармавання насельніцтва ў Любанскім райвыканкаме прайшла інструкцыйна-метадычная нарада
З удзелам ідэалагічнага актыву, дэпутата Палаты прадстаўнікоў Нацыянальнага сходу Рэспублікі Беларусь Аксаны Ільковіч абмеркаваны актуальныя тэмы. Асноўная – “Мы разам назаўсёды: да 85-годдзя ўз’яднання Заходняй Беларусі і БССР”. У фармаце відэаканферэнцыі яе асвяціў з навуковага погляду і пазіцыі гістарычнай праўды загадчык аддзела навейшай гісторыі Беларусі, кандыдат гістарычных навук інстытута гісторыі Нацыянальнай акадэміі навук Сяргей Траццяк. Разам з ім удзельнікі нарады здзейснілі экскурс у мінулае, прааналізавалі перадумовы важнай для нашай краіны падзеі. Прыгадалі той няпросты шлях, які давялося прайсці нашым суайчыннікам.
Пасля заключэння ў 1921 годзе Рыжскага мірнага дагавора беларускі народ спазнаў трагедыю нацыянальнага раз'яднання. Звыш 110 тыс. квадратных кіламетраў заходніх беларускіх зямель, на якіх пражывала каля 4,5 млн чалавек, апынуліся ўключаны ў склад Польшчы. На акупаваных тэрыторыях, якія палякі называлі “крэсы ўсходні”, яны паводзілі сябе як каланізатары. А тых, хто спрабаваў супрацьстаяць паланізацыі каралі. У 1934 годзе ў Бярозе-Картузскай з'явіўся канцэнтрацыйны лагер, дзе ў жудасных умовах утрымліваліся тысячы такіх грамадзян, як небяспечных элементаў для акупантаў. Праз гэту фабрыку смерці, на жаль, прайшлі многія беларусы, якія, так бы мовіць, змагаліся за права “людзьмі звацца”.
І гэта было недарма – справядлівасць перамагла. Пасля пачатку другой сусветнай вайны 1 верасня 1939 года Польшча пацярпела хуткае паражэнне ў вайне з Германіяй. А 17-га ў абстаноўцы краху Польскай дзяржавы Чырвоная Армія ўвяла войскі на тэрыторыю Заходняй Беларусі. Гэты вызваленчы паход вырашыў лёс нашай краіны: пачалося аб’яднанне Заходняй і Усходняй Беларусі.
Сёння, праз 85 гадоў пасля той падзеі, наш народ па-ранейшаму адзіны ў выбары стратэгічнага курсу на развіццё моцнай і суверэннай дзяржавы. “І так павінна быць заўсёды, каб супрацьстаяць знешнім выклікам і пагрозам, санкцыённаму ціску і інфармацыйнай вайне, зберагчы спадчыну і перадаць яе наступным пакалення”, – адзначылі ўдзельнікі нарады.
У працяг размовы ўвага была акцэнтавана на папярэджанні пажараў і надзвычайных сітуацый у жылым фондзе і прыродных экасістэмах. Прадстаўнікі абласнога ўпраўлення і раённага аддзела па надзвычайных сітуацыях давялі сумную статыстыку і нагадалі алгарытм прафілактычнай работы з насельніцтвам па прадухіленні ўзгаранняў, якія прыносяць вялікія страты, а часта ставяць пад пагрозу і чалавечае жыццё.
Яшчэ адной прычынай смяротнасці ад знешніх прычын з’яўляюцца суіцыды. На шчасце, сёлета ў нашым раёне намецілася станоўчая тэндэнцыя, і такіх выпадкаў зарэгістравана менш, чым летась, падкрэсліла намеснік старшыні райвыканкама Тамара Дамашэвіч. Тым не менш трэба быць уважлівымі да тых, хто побач, каб пазбегнуць трагедый.
